गाईघाट । गायक रामकृष्ण ढकालको स्वर, बलराम समालको सङ्गीत र युवा गीतकार खेम अधिकारीको शब्द रहेको ‘चुहिएको छानो’ बोलको गीतको भिडियो छायाङ्कन सम्पन्न भएको छ। निर्देशक दीपक बान्तवा राईका अनुसार भिडियो तिहारमा सार्वजनिक गर्ने तयारी गरिएको छ।

लामो समय नेपाली चलचित्रमा छायाङ्कनको काम गरेका राईको यो करिब डेढ दशकपछिको कमब्याक हो। चलचित्रको रङ्गीन दुनियाँबाट टाढिएर हाल पर्यापर्यटन तथा वन संरक्षणको क्षेत्रमा सक्रिय राईले ‘चुहिएको छानो’मार्फत पुनः कला क्षेत्रमा आफ्नो उपस्थिति जनाउन लागेका हुन्।

निर्देशक राईका अनुसार गीतको भिडियोमा पछिल्लो समय समाजमा व्याप्त विभिन्न विसङ्गतिविरुद्ध सचेतनामूलक सन्देश प्रस्तुत गरिएको छ। मनोरञ्जनसँगै सामाजिक चेतना अभिवृद्धि गर्ने उद्देश्यले भिडियो निर्माण गरिएको उनले बताए।

भिडियोमा टिकटक स्टार गोपाल कृति, गीतकार खेम अधिकारी, इन्दिरा आचार्य, कृष्णकल्प दुलाल, गोठकृष्ण ठकुरी र बालकलाकार आभूषण अधिकारीलगायतले अभिनय गरेका छन्। सहायक निर्देशक बिरश बाबु शाहीले भिडियोमा स्थानीय कलाकारहरूको अभिनय रहेको जानकारी दिए।

उदयपुरको सदरमुकाम गाईघाट तथा आसपासका रमणीय स्थानमा छायाङ्कन गरिएको भिडियोले स्थानीय प्राकृतिक सौन्दर्यलाई समेत समेटेको छ। तिहारमा सार्वजनिक गर्ने तयारी गरिएको ‘चुहिएको छानो’ले सामाजिक सन्देशसँगै उदयपुरको पर्यटन प्रवर्द्धनमा समेत योगदान पुर्‍याउने अपेक्षा गरिएको छ।

उदयपुर । कोशी प्रदेशका मुख्यमन्त्री हिक्मतकुमार कार्कीले मरणोपरान्त आँखा दान गरेर दृष्टिविहीनलाई संसार देखाउने अभियान प्रदेश सरकारले अघि बढाएको बताउनुभएको छ ।
मदन भण्डारी आँखा अस्पताल, उदयपुरले आयोजना गरेको ‘स्मृति वृक्षरोपणको सातौँ वार्षिक उत्सव’ कार्यक्रमलाई आइतबार सम्बोधन गर्दै मुख्यमन्त्री कार्कीले कोशी प्रदेशका कम्तीमा एक हजार दृष्टिविहीनलाई आँखा प्रत्यारोपणमार्फत संसार देखाउने अभियान सुरु गरिएको बताउनुभयो ।
उहाँले मरणोपरान्त दान गरिएका आँखाको उपयोग गरी दृष्टिविहीनलाई दृष्टि प्रदान गर्ने कार्यमा प्रदेश सरकार लागिपरेको बताउँदै आफूले समेत मरणोपरान्त आँखा दान गरिसकेको जानकारी दिनुभयो ।
“मानिस मरेपछि पनि उसको शरीरका अङ्ग अरूका लागि उपयोगी हुन सक्छन् । आँखा दान गरेर आफू संसारबाट बिदा भएपछि पनि अरूलाई संसार देखाउन सकिन्छ,” मुख्यमन्त्री कार्कीले भन्नुभयो, “त्यसैले मरणोपरान्त अङ्ग दान गर्नु पुण्यको काम हो ।”
मुख्यमन्त्री कार्कीले मदन भण्डारी आँखा अस्पतालले स्वास्थ्य सेवासँगै वातावरण संरक्षण र सामाजिक स्मृतिलाई जोडेर अघि बढाएको वृक्षारोपण अभियान प्रशंसनीय रहेको बताउनुभयो ।
अस्पतालले आफ्ना स्वर्गीय आमाबुबाको स्मृतिमा अस्पताल परिसरमा विभिन्न प्रजातिका बिरुवा रोप्दै आएको छ । सोही क्रममा मुख्यमन्त्री कार्कीले आफ्ना स्वर्गीय बुवा बमबहादुर कार्की र आमा जानुकादेवी कार्कीको स्मृतिमा अस्पताल परिसरमा ‘सिता अशोक’को बिरुवा रोप्नुभएको अस्पतालका अध्यक्ष भागवत राउतले जानकारी दिनुभयो ।
अध्यक्ष राउतका अनुसार अस्पताल परिसर रहेको दृष्टिकुञ्ज परिसरमा यसअघि पनि पूर्व प्रधानमन्त्री, पूर्वसभामुख लगायत विभिन्न उच्च पदस्थ व्यक्तित्वले आफ्ना दिवङ्गत अभिभावक तथा पितृको स्मृतिमा वृक्षारोपण गरिसक्नुभएको छ । स्मृतिमा रोपिएका ती बिरुवाले अस्पताल परिसरलाई हरियाली बनाउनुका साथै दिवङ्गत आफन्तको सम्झनालाई जीवन्त राख्ने काम गरिरहेको अस्पतालले जनाएको छ ।
मदन भण्डारी आँखा अस्पतालको परिसर, त्रियुगा नगरपालिका–१०, बाँसबारीमा आयोजित कार्यक्रममा कोशी प्रदेश सभा उपसभामुख सृजना दनुवार, प्रदेशसभा सदस्यहरु, त्रियुगा नगरपालिका उपप्रमुख महेश्वरी राई, जनप्रतिनिधिहरू, स्वास्थ्यकर्मी, सञ्चारकर्मी, विभिन्न राजनीतिक दलका नेताहरू, अस्पताल व्यवस्थापन समिति, कर्मचारी तथा स्थानीयको सहभागिता रहेको थियो ।

उदयपुर। गाईघाटस्थित मदन भण्डारी आँखा अस्पतालले विद्यालयस्तरका विद्यार्थीहरूको आँखा जाँच गरी निःशुल्क चस्मा वितरण गरेको छ। अस्पतालले त्रियुगा नगरपालिकाभित्रका विभिन्न विद्यालयमा अध्ययनरत विद्यार्थीहरूको दृष्टि परीक्षण गरी समस्या देखिएकाहरूलाई निःशुल्क चस्मा प्रदान गरेको हो।

अस्पतालको प्रावि धिक टोलीले प्रत्यक्ष रूपमा विद्यालयहरूमै पुगेर विद्यार्थीहरूको आँखा परीक्षण गरेको थियो। सो क्रममा दृष्टिमा समस्या (दृष्टिदोष) पहिचान भएका विद्यार्थीहरूलाई उनीहरूको आवश्यकताअनुसारको चस्मा निःशुल्क उपलब्ध गराइएको अस्पतालका अध्यक्ष भागवत राउतले जानकारी दिनुभयो।

आँखाको दृष्टि कमजोर भएकै कारण धेरै विद्यार्थीले पढाइमा कठिनाइ महसुस गर्ने तथा शैक्षिक प्रगतिमा बाधा पुग्ने गरेको भन्दै अध्यक्ष राउतले यो कार्यक्रमले उनीहरूको दैनिक पठनपाठन र शैक्षिक गतिविधिमा ठूलो सकारात्मक सहयोग पुग्ने विश्वास व्यक्त गर्नुभयो।

विद्यार्थीहरूमा देखिने दृष्टिसम्बन्धी समस्यालाई समयमै पहिचान गरी उचित उपचार तथा सहयोग पुर्‍याउने उद्देश्यले अस्पतालले यो कार्यक्रम सञ्चालन गरेको जनाएको छ।